Amerika Birləşmiş Ştatlarında kommersiya hüquqi şəxslər, onların növləri və təsis edilməsi (3-cü hissə)

ABŞ-da şirkətinizi yaratmaq üçün hansı ştatı seçməlisiniz? Vergi və digər xərclər

Şirkət təsis etmək və qeydiyyatla bağlı qanunlar Amerikada ştatlara nəzərən spesifik şəkildə dəyişir. ABŞ 50 ştat və Vaşinqton ərazisindən ibarətdir ki, bu da 51 fərqli ərazi, fərqli qanunlar və fərqli lokal vergi dərəcələri deməkdir.

Ümumi olaraq əlverişliliyi nəzərə alsaq, harada fəaliyyət göstərməyi planlaşdırırsınızsa, orada şirkət açmalısınız. Fiziki olaraq ABŞ-da  mütəmadi fəaliyyət göstərməyəcək şirkətlər üçün isə istənilən ştat seçilə bilər.

Amma suala daha geniş cavab verməli olsaq, bu sizin faktiki vəziyyətinizdən asılıdır. Məsələn, əgər şirkətinizin ofisini Mayami şəhərində açırsınızsa, qeydiyyatınızı müvafiq olaraq Florida əyalətində tamamlamalısınız. Əgər fiziki olaraq fəaliyyət yeriniz ABŞ-da olmayacaqsa, biznesi xaricdən idarə etməyi planlayırsınızsa, korporasiya və ya LLC-ni Delaver və ya Nevada kimi biznes üçün daha əlverişli ştatlarda yaratmaq məqsədəuyğun seçim olar. Şirkəti bir ştatda təşkil edib, istənilən digər ştatda əməliyyatlar aparmaq olar. Əgər şirkətiniz birdən çox ştatda fəaliyyət göstərirsə, siz qeydiyyat üçün  bu ştatlardan hər hansı birini seçə bilərsiniz, amma həm də digər ştatlarda işinizi davam etdirmək üçün xüsusi prosedurdan keçib bunu rəsmiləşdirməlisiniz.

LLC- ni nə vaxt və harada açmağınız sizin vergi güzəştlərinizi və məsuliyyətlərinizin dərəcəsini müəyyənləşdirən əsas amil olacaq. Məsələn, Delaver öz qanunvericiliyi və əlverişli vergi sistemi ilə şirkət yaratmaq üçün ən uyğun ştatlardan biri hesab edilir. Delaverdə sizin sadəcə əlaqə üçün bir şəxsə və Delaver qeydiyyatlı agentə ehtiyacınız var.

Delaver və Florida ştatları misalında fərqlilikləri bu cür təhlil edə bilərik:

İnkorporasiya: hər iki ştat sizə öz hüquqi şəxsinizi onlayn qaydada yaratmaq imkanı verir ki, bu da xarici subyektlər üçün çox əlverişlidir. Qeydiyyat xərcləri isə, Floridada LLC üçün minimal xərc 125 dollar, korporasiyalar üçün isə 70 dollardır. Delaverdə isə minimal xərc korporasiyalar üçün 89 dollar, LLC-lər üçün 90 dollardır.

Françayz vergisi: bu vergi ştatların ərazisində olduğu üçün şirkətlərdən aldığı vergidir. Delaver üçün bu verginin dərəcəsi şirkətlərdə xalis mənfəətdən 8.7 % və fiziki şəxslər üçün 2.2-5.95 % aralığında dəyişir. Floridada isə françayz vergisi ümumiyyətlə tutulmur.

Anonimlik: bəzi ştatlar şirkətin səhmdarları və ya üzvləri üçün tam anonimliyə icazə verir. Lakin, Delaverdə anonimlik məhdud xarakterlidir, belə ki, şirkətlər bəzi informasiyaları ictimaiyyətə açıq, əlçatan etməlidirlər. Floridada isə hal-hazırda anonimlik demək olar ki, qorunmur, hər kəs sizin şirkətinizə dair məlumatlara daxil ola bilər.

İnzibati idarəetmə: Florida qanunvericiliyi onsuz da elastik olan LLC strukturunu daha da yumşaldır. Belə ki, gəlir bölgüsü və icraçı rolları üzvlər özləri müəyyən edə və seçə bilərlər. Delaverdə isə bu qaydalar daha sərtdir.

Vergilər:

Federal vergi eyniləşdirmə nömrəsi İşəgötürənin Eyniləşdirmə Nömrəsi ( Employer Identification Number- EIN)  kimi adlanır və sizə qanuni olaraq şəxsləri işə götürmək, federal vergiləri ödəmək, lisenziyalar üçün müraciət etmək və biznesiniz üçün bank hesabı açmaq icazəsi verir. EIN üçün IRS-in vebsaytı vasitəsilə müraciət edə bilərsiniz. İşçi cəlb etmək və onların məvacibini ödəmək, vergi bəyannamələrini doldurmaq, korporasiya kimi fəaliyyət göstərmək üçün EIN-ə sahib olmaq mütləq tələbdir.

Əgər qeyr-rezidentsinizsə, Amerikada yalnız ABŞ-dakı mənbələrdən alınan gəlirlər üçün vergi ödəyirsiniz, məsələn, LLC gəlirindən payınız üçün vergi ödənilməlidir. ABŞ-da fəaliyyət göstərməyən bizneslər (əgər ABŞ-dakı hər hansı mənbədən gəlirləri yoxdursa) heç bir federal vergiyə cəlb edilmirlər, lakin bəzi illik ştat üçün məcburi ödənişlər və ya LLC-ni, korporasiyanı saxlamaq üçün xərclər tələb oluna bilər.

C-corplar üçün ikiqat vergi öhdəliyi var, amma 21% vergi dərəcəsi sabit dərəcədir və bu bəzi hallarda C-corp üçün əlverişli ola bilər. Hər bir halda ikiqat vergi ödənilməsi məsələsi diqqətdə saxlanmalıdır. İkiqat vergi dedikdə həm şirkət üçün, həm də şəxsiniz üçün vergi ödənilməsi öhdəliyi nəzərdə tutulur. C-korporasiya öz gəlirindən vergi ödəyir, daha sonra səhmdar da aldığı dividenddən vergi ödəyir.

LLC IRS tərəfindən vergi məqsədləri üçün ayrıca hüquqi şəxs kimi qəbul edilmir. LLC-lər vergiləri birbaşa ödəmirlər, lakin buradan əldə edilən gəlir sahibə ötürülür ki, bu mərhələdə vergi tutulur.

C-corplar üçün vergitutmanın qarışıqlığına baxmayaraq vergi dərəcələri və şərtləri C-corpda gəlir səviyyənizdən asılı olaraq daha əlverişli ola bilər. LLC-də vergi bir mərhələdə alındığı üçün  bütün gəlirdən vergi öhdəliyinə görə bir dəfəyə 37%- ə qədər vergi alına bilər. Stabil 21%-lik mənfəət vergisinin olması C-corpların üstün tərəfi ola bilər, yenə də ikiqat vergiyə görə dividendlərin də vergiləri nəzərdə saxlanmalıdır.

Bu məqalədəki yazılar ümumi məlumat xarakterlidir və hüquqi məsləhət deyildir.